阿仙奴同貝達傾掂數　下周上任成新總監

阿仙奴物色新總監行動即將完成，多個可靠消息報道，前馬德里體育會總監貝達已同阿仙奴達成協議，預計下個星期可以正式上任，提早為夏季組軍做準備。

Fabrizio Romano同《The Athletic》等爆料，阿仙奴喺行政總監加歷、老闆祖殊高安基同領隊阿迪達等人商議下，決定同53歲嘅意大利總監貝達簽約，AC米蘭日前曾試圖出手「截胡」，但貝達亦視加盟阿仙奴為首選，最終雙方一拍即合。

貝達自2013年開始加入馬體會，由最初擔任球探，慢慢爬上技術總監再到體育總監喺2019年獲選為歐洲「最佳總監」，今年1月先至解約離開。阿仙奴原本總監伊度喺上年11月辭職，總監位置一直「真空」，據報貝達喺夏天將肩負重建任務，轉會目標包括前鋒、翼鋒、防守中場同門將。