利物浦候任門將西甲派膠　利迷驚唔驚？

利物浦將於來季換龍門，現效力華倫西亞嘅馬馬達舒維尼，將於來季加盟，取代艾利臣比加，但該位格魯吉亞門神，上輪西甲為華倫西亞把關時突然「派膠」失波，事後公開致歉，慶幸嘅係，華倫西亞最後都贏波。

華倫西亞今輪西甲主場對華拉度列，戰至40分鐘，馬馬達舒維尼接應隊友回傳後，竟然直接將個波送畀對方前鋒，對方當然唔客氣一射入網，累球隊被追成1比1，不過後來華倫西亞又攻入1球，最終贏2比1，馬馬達舒維尼唔使做罪人。

馬馬達舒維尼事後喺個人IG發文，公開致歉：「我現時唔喺最佳狀態，但困難會令人變得堅強，我會盡力踢出最佳水準，以報答球迷支持，今場勝仗非常重要，令我哋有信心應付往後比賽，繼續向前。」

利物浦以往都曾經受「膠龍」所害，2018年卡利奧斯在歐聯決賽對皇家馬德里連環「派膠」，累球隊失落冠軍，佢哋呢幾年有艾利臣比加坐鎮，成績亦回復穩定，球隊來季將會換龍門，馬馬達舒維尼呢場突然「派膠」，利迷驚唔驚？