尼馬又受傷　想返巴塞難度高咗

山度士剛在聖保羅州錦標賽4強，作客1比2不敵哥連泰斯，巴西王牌尼馬並無上陣，據報原來佢又傷咗。

巴西傳媒報道，尼馬前一場上陣對巴拉干天奴紅牛，賽後發現左大腿腫脹，用咗一星期治療仍未見好轉，為保險起見教練唔敢派佢上陣，結果球隊輸波。

尼馬傷勢應該唔算太嚴重，稍為休息就冇事，而佢亦打算重返國家隊，出戰嚟緊對阿根廷同哥倫比亞嘅世界盃外圍賽。

不過今次受傷，就大大影響尼馬重返巴塞隆拿機會，西班牙傳媒報道，巴塞體育總監迪高認為，尼馬已經33歲，狀態難復舊觀，而且身體脆弱，不符合巴塞增兵理念，而之前已有傳聞，要求尼馬先喺山度士射入15球，先有資格傾重返巴塞事宜。