高圖爾斯國家隊自出自入　比利時門將退役抗議

比利時國家隊近年青黃不接，成績出現下滑，最近更爆出內訌。之前因同領隊不和而退隊嘅門將泰拔高圖爾斯，近日突然宣布回歸國家隊，但呢個決定就令現任正選卡斯迪爾斯不滿，32歲嘅佢更宣布退役唔再代表比利時，以示不滿。

效力皇家馬德里嘅門將高圖爾斯，喺2023年因為不滿「隊長爭奪」輸畀盧卡古，表明唔會為時任領隊泰迪斯高效力，但隨住比利時改聘魯迪加西亞執教，高圖爾斯早前就表示願意再為國效力，比利時足總亦歡迎佢嘅決定，準備重召佢歸隊。

過去1年成為正選嘅卡斯迪爾斯就嬲爆表示：「好奇怪足總態度180度轉變，鋪晒紅地毯去歡迎高圖爾斯回歸，我覺得高圖爾斯有權喺國家隊自出自入係好古怪，我嘅矛頭主要係指向足總，呢種做法並唔符合團體嘅價值觀，由依家開始我唔會再代表比利時出賽。」