前無古人　夏蘭特今晚挑戰一項神紀錄

曼城將於周六(15日)晚上11點英超主場對白禮頓，前鋒艾寧夏蘭特只要有入波或者助攻，就會成為英超史上第1位踢少於100場聯賽，創造到100個入波嘅球員。

艾寧夏蘭特加盟曼城以來，累積上陣93場英超，合共創造99個入波，包括射入83球及16次助攻，換言之呢位24歲挪威國腳今場只要入1球或者1次助攻，就達到100球大關。英超成立以來，從未有球員能夠用少於100場聯賽，創造到100球，夏蘭特現時有機會改寫歷史。

曼城領隊哥迪奧拿話：「夏蘭特表現令人難以置信，佢一定可以喺英超創造100球，當然佢亦要付出更大努力，先至可以幫球隊實現目標。」艾寧夏蘭特過去2季英超都奪得神射手獎，今季以20球排射手榜第2位，落後穆罕默德沙拿7球，要完成神射手獎3連霸，恐怕唔容易。