又到季尾　莫迪歷想喺皇馬踢多一季

同皇馬逐年簽約嘅克羅地亞隊長莫迪歷，最近表態話自己仲未打算掛靴，皇馬仍然係佢「第一志願」，希望繼續喺「銀河艦隊」再踢1年。

「轉會專家」羅曼諾報道，莫迪歷合約到今年6月，佢希望同皇馬續約1年，皇馬永遠係佢第一選項。

39歲嘅「魔笛」現時身價只有500萬歐元(約4,250萬港元)，但佢仍然係皇馬中場主力，今季上陣45場，當中20場踢正選，交出4球7助攻。皇馬現時西甲排第2，歐聯8強、西班牙盃4強。