奧斯爾疑撐極端組織　雲達不來梅「封殺」

近期走入政壇嘅德國名將奧斯爾，近日被前球會雲達不來梅「封殺」，球會發言人指奧斯爾嘅價值觀同球會背道而馳，所以唔想佢重返球會。據報「封殺」真正原因，係奧斯爾同土耳其極端組織「灰狼」關係密切有關。

雲達不來梅即將為前球星、巴西中場迪亞高舉行「告別賽」，答謝呢位40歲球星喺2006年至09年間嘅為球隊嘅傑出貢獻，唔少昔日隊友都獲邀出席，唯獨最受注目嘅奧斯爾冇份。雲達不來梅發言人向《圖片報》表示：「我哋同迪亞高都同意唔請奧斯爾，因為佢嘅價值觀同球會背道而馳。」

奧斯爾同土耳其總統埃爾多安關係密切，最近更加入正義與發展黨(AKP)，踏入政壇之路，而依家操到變「筋肉人」嘅奧斯爾，最近被發現胸口有「灰狼」紋身，「灰狼」係土耳其右翼極端民族主義組織，曾發動惡怖襲擊同暗殺政要等行動。