阿仙奴喜訊　沙卡下場聯賽復出

國際賽期完結後，歐洲球季即將迎嚟最後衝刺，英超勁旅阿仙奴就收到好消息，因傷缺陣超過3個月嘅布卡約沙卡，據報已經完全康復，下周英超對富咸如無意外可以復出。

沙卡自上年底對水晶宮大腿拉傷後，缺陣阿仙奴對上19場比賽，期間球隊只有10勝6和3負成績，英超爭標機會渺茫，依家最大目標係喺歐聯爭取佳績，而沙卡回歸將係及時雨。

據阿仙奴跟隊記者Charles Watts報道，如果未來1個星期訓練冇「意外」，沙卡可以喺下周三(2日)對富咸嘅聯賽復出，但為謹慎起見，可能只會後備上陣，因為3日後仲有一場聯賽作客愛華頓，而最大目標係喺4月9日歐聯8強迎戰皇家馬德里嗰陣，沙卡可以進入理想作戰狀態。

阿仙奴早前大鬧前鋒荒，夏維斯同加比爾捷西斯都重傷收咧，要勞煩中場米基爾馬連奴客串中鋒，但隨住加比爾馬天尼利同沙卡回歸，相信球隊成績可以逐步提升。