伊斯1射1傳打爆富咸　水晶宮入4強

水晶宮憑英格蘭前鋒伊比爾治伊斯交出1入球1助攻，作客以3比0擊敗富咸，打入英格蘭足總盃4強。

水晶宮近況絕佳，近7場贏6場，作客5連勝，今場保持好表現，就連英格蘭主帥杜曹都入場睇波，上圈賽事左耳受傷縫25針嘅桑馬迪達亦告復出，戴頭盔上陣；至於上圈淘汰曼聯嘅富咸，今場未能發揮水準，結果吞3蛋出局。

上半場34分鐘，伊比爾治伊斯左路切入中路，禁區頂右腳熨死角入網，協助水晶宮先開紀錄，4分鐘後伊斯再於左路進攻，底線傳中予伊斯美拿沙亞近門頭槌破網，水晶宮短時間內領先到2比0。

下半場富咸全力反撲，水晶宮專心打反擊，75分鐘兩名後備合力炮製入波，鎌田大地助攻尼基迪亞射穿賓特尼奴「大細龍門」， 水晶宮贏到3比0，繼2022年後再度殺入4強。