狼隊翼鋒唔嫌棄曼聯冇歐聯資格　願意加盟

曼聯今夏換血最大障礙就係歐聯資格存疑，只能透過歐霸盃奪冠轉戰歐聯，不過凡事有例外，狼隊巴西翼鋒馬菲奧斯根夏就唔介意有冇歐聯資格，都願意加盟曼聯。

因為歐聯資格存疑，曼聯想簽兩大神鋒瑞典約基利斯同尼日利亞域陀奧森漢都相繼觸礁，頂級球員唔願加盟，幸好曼聯始終有佢吸引力，25歲嘅馬菲奧斯根夏就唔介意歐聯資格，據報無論曼聯取得歐聯資格與否，都接受曼聯斟介。

馬菲奧斯根夏踢過德甲同西甲，2023年1月由馬體會先借後買方式加盟狼隊，兩季半上陣85場入31球，包括今季29場15球4助攻，表現出色，同狼隊合約到2029年6月，解約金高達6,250萬鎊(約6.25億港元)。