巴塞輸波晉級　「後美斯時代」首入歐聯4強

周三(16日)凌晨歐聯8強次回合，巴塞隆拿作客多蒙特為一場「例行公事」製造驚險，雖然1比3落敗被打破今年不敗身，但巴塞首回合大勝4比0，兩回合合計仍然贏5比3晉級，相隔6年後再度躋身歐聯4強。

巴塞今場表現唔集中，多蒙特11分鐘就由古拉斯主射12碼入波，49分鐘古拉斯再喺角球攻勢頂入，不過突然緊張嘅戰況只係維持5分鐘，多蒙特後防賓斯拜尼擺烏龍，令球隊氣勢被打窒，就算古拉斯喺76分鐘完成「帽子戲法」，幫多蒙特次回合贏3比1，仍然難逃出局命運。

巴塞踏入2025年後首次輸波，24場不敗走勢斷纜，教練費歷克賽後表示：「我哋今場狀態唔係最好，但晉級4強嘅目標已經達成，歐聯係全世界最好嘅賽事，能夠入4強係令人光榮嘅事。」巴塞對上一次入歐聯4強已經係18/19球季，當時球隊仲係由美斯領軍。