歐洲3大盃賽4強誕生　英超成大贏家或壟斷冠軍

經過周五(18日)凌晨歐霸盃及歐協聯8強次回合比賽之後，今屆歐洲3大盃賽嘅4強席位塵埃落定，英超球隊成為大贏家，獨佔4席，並分佈於3項賽事，換言之有望囊括所有錦標。

歐聯4強由英、西、意、法球隊瓜分，英超代表阿仙奴上圈「雙殺」上屆冠軍皇馬，展現霸氣，將於4強對巴黎聖日耳門，至於國際米蘭及巴塞隆拿爭奪另1個決賽席位。

歐霸盃方面，英超兵團更加佔半壁江山，曼聯對畢爾包，熱刺對波杜基林特，換言之有望出現「全英決賽」曼聯鬥熱刺。

至於歐協聯戰線，車路士實力超班，加上4強對手只係瑞典球隊佐加頓斯，晉級決賽機會高唱入雲，一旦打入決賽，無論遇上貝迪斯，抑或費倫天拿，相信都可以佔上風。

德甲球隊最令人失望，8支參加今屆歐洲賽嘅球隊，已經全軍覆沒。