巴塞驚聞噩耗　羅拔仔肌肉撕裂抖3周

巴塞隆拿今季橫掃球壇，不過季尾連場大戰前驚聞噩耗，波蘭前鋒羅拔利雲度夫斯基喺對切爾達場聯賽受傷，據報檢查後發現大腿肌肉撕裂，將面臨休息3個星期，錯過西盃決賽同歐聯4強等大戰。

巴塞對切爾達一仗踢到77分鐘，羅拔仔左腳大腿受傷退下火線，據西班牙隨隊記者報道，羅拔仔出現大腿肌肉撕裂，估計要抖3個星期，但需要進一步檢查確定傷情。如果噩耗證實，呢位前鋒將錯過西盃決賽對皇家馬德里，就連歐聯4強對國際米蘭兩回合賽事都踢唔到，對巴塞影響極大。

巴塞教練費歷克賽後表示：「我哋只能夠等待(檢查報告)，根據我嘅經驗，要到第2日先會知道詳細結果。」若羅拔仔受傷，巴塞仍有費倫托利斯可以頂上，而丹尼爾奧莫亦可以出任「假9號」角色。