爭霸逆轉！國米輸波折將　拿玻里賽程有利

意甲爭標形勢逆轉！榜首國際米蘭喺周一(21日)凌晨，作客0比1不敵博洛尼亞，依家僅憑得失球壓倒同得71分嘅拿玻里，但拿玻里剩低賽程更加有利，國米衞冕陷入大危機！

國米喺歐聯殺入4強，球員激戰後表現下滑，今場作客只得1次中目標攻門。博洛尼亞攻勢較盛，但入肉埋門唔多，最後喺補時4分鐘靠柯蘇連尼神來之筆，禁區內巧妙勾射破網，助博洛尼亞贏1比0。

國米輸波之餘，仲有巴斯東尼同米希達利恩拎到黃牌，「夠數」要喺下輪聯賽對羅馬停賽，教練施蒙尼恩沙基賽後表示：「我哋要接受現實同保持冷靜，因為聯賽仲未完結。」

意甲只剩5輪，國米同拿玻里依家同分，但國米仲要兼顧意盃同歐聯戰線，到季尾幾乎都係1周雙賽，反而拿玻里就專心意甲爭霸，而且國米最後5輪仲要對羅馬同拉素，而拿玻里最後對手，排名最高只係第10位嘅拖連奴。