曼聯好消息　迪亞路下周復操

曼聯翼鋒阿密特迪亞路2月初受傷後，一度傳出會提早收咧，幸好呢位22歲科特迪瓦國腳康復進度比預期快，根據「轉會權威」記者羅曼諾(Fabrizio Romano)爆料，阿密特迪亞路下星期可以參加團隊操練，意味一旦曼聯打入歐霸盃決賽，佢有望上陣。

阿密特迪亞路因為操練期間，不幸整傷足踝，已休戰超過2個月，現時已經冇大礙，如無意外，下星期就可以加入大隊一齊操練。曼聯今季仲有5場英超，並已打入歐霸盃4強，預料阿密特迪亞路有機會復出踢5月11日晚英超主場對韋斯咸。如果紅魔鬼能夠淘汰畢爾包，就會喺5月22日凌晨踢歐霸盃決賽，屆時迪亞路應該可以披甲。

阿密特迪亞路今季為曼聯上陣36場入9球及8次助攻，屬於隊內表現最出色嘅鋒線球員，佢趕及季尾復出，對於攻力疲弱嘅紅魔鬼而言，絕對係一場及時雨。