傑斯中肯分析　建議福仔永久「脫魔」

拉舒福特年初被曼聯外借去阿士東維拉後，表現回勇，呢位27歲英格蘭國腳今夏會否重返紅魔鬼，備受關注。曼聯名宿傑斯認為，「福仔」應該永久轉會離隊，對於佢及曼聯而言，都係最好結果。

傑斯出席前曼聯隊友里奧費迪南主持嘅節目時話：「我認為拉舒福特效力曼聯，並唔開心，佢現時踢維拉，睇來更加開心，仲記得第1次同拉舒福特見面，當時係訓練分隊賽，見佢突然連入幾球，感到非常震撼，佢好似其他年輕人一樣，喜歡自由踢波，但近年明顯唔係咁，我認為拉舒福特離開曼聯，對雙方都有好處，可能佢效力另一隊，會成為出色球員，但我唔知邊一隊。」根據借用合約，阿士東維拉今夏有權以4,000萬鎊(約4億港元)買斷拉舒福特。

另外，傑斯指曼聯領隊魯賓艾摩廉充滿魅力，但需要畀佢更多時間，等經過多幾個轉會窗，為曼聯進行重建後，球隊將會復甦。