利萊辛尼拒絕誘惑　減薪留拜仁

今夏約滿拜仁慕尼黑嘅利萊辛尼，據報拒絕來自阿仙奴同伊蒂哈德嘅高薪誘惑，打算減薪同拜仁續約3年至2028年，為咗完成同隊友嘅約定，一齊衝擊歐聯冠軍。

29歲嘅利萊辛尼效力拜仁5年，合約今夏到期，即將回復自由身嘅佢收到來自阿仙奴高薪報價，沙特豪門伊蒂哈德更開出稅後2,500萬歐元(約2.2億港元)年薪，利萊辛尼全部拒絕，決定同拜仁續約，年薪由1,500萬歐元降至1,000萬歐元(約1.32億港元至8,800萬港元)，500萬歐元浮動獎金(約4,400萬港元)則維持不變。

德國傳媒報道，促成利萊辛尼續約，全因球員之間一句承諾，利萊辛尼同隊友穆斯亞拿是親密戰友，彼此約定要一齊贏取歐聯冠軍，後來哈利卡尼加盟，3人組成鐵三角，穆斯亞拿同哈利卡尼齊齊向會方施壓，要求留用利萊辛尼，最終雙方達成續約協議。