高柏尼被寸教波冇捧過盃　佢用一證據回應

拜仁慕尼黑如果周六(26日)晚德甲主場擊敗緬恩斯，再加上第2位利華古遜失分，就可以提早奪得聯賽冠軍，賽前拜仁主帥高柏尼被傳媒問到，即將獲得教波生涯「首項冠軍」，有乜感受時，呢位39歲比利時少帥非常介意，立即反駁，話自己之前曾率領般尼成為英冠冠軍。

當時記者問高柏尼：「你球員時代贏過好多冠軍，作為教練將迎來第一項冠軍，對於你來講，是否意義更大？」高柏尼話：「太不可思議，今個星期已經第2次有人話我將首次教波奪冠，但其實我曾經率領般尼捧盃。」

高柏尼所指係擔任般尼領隊期間，於2022/23年球季協助球隊成為英冠王者，並升上英超，但外界似乎唔當呢項次級聯賽錦標係「冠軍」。

除咗高柏尼好大機會獲得教波生涯首個頂級賽事冠軍之外，拜仁前鋒哈利卡尼亦可望打破職業生涯錦標荒。