比克福特送禮　車路士嗒糖做4哥

英超早場，主場出擊嘅車路士憑尼高拉斯積遜一箭定江山，以1比0擊敗愛華頓，全取3分後暫時升上第4位，爭奪歐聯入場券重奪主動權。

「藍戰士」並未為嚟緊周中歐協聯4強首回合作客佐加頓斯留力，盡遣精銳出擊；愛華頓降班威脅已解除，球員作戰心態比較輕鬆。比賽初段車路士撳住攻，先有馬度基推順射死角，愛華頓門將比克福特落地夠快撲出，但去到27分鐘比克福特一次失誤就出事，該位英格蘭國腳門將開龍門球唔湯唔水，比圖比東卡中圈攞波未企得穩，就畀杜利奧查洛巴從後篤甩，安素費南迪斯接應立即交直線，尼高拉斯積遜輕鬆射成1比0。

「拖肥糖」失守前都未攻過門，直至完半場前先憑杜哥利衝前頭槌勁頂，可惜時間唔啱唔中目標。下半場愛華頓攞番唔少攻勢，但到肉埋門唔多，反而車路士馬度基另一次起腳，又畀比克福特救到，臨尾尼高拉斯積遜門前「執雞」可惜越位「食詐胡」，最終車路士維持1比0勝局完場。