根夏1射2傳平巴西兵紀錄　為加盟曼聯造勢

周六(26日)晚英超，狼隊主場以3比0大勝李斯特城，前鋒馬菲奧斯根夏射入1球及2次助攻，今季聯賽已有15球進帳，追平羅拔圖法明奴、加比爾馬天尼利嘅紀錄，成為英超史上單季聯賽最多入波嘅巴西球員之一，盛傳根夏即將加盟曼聯，正好用呢項數據證明身價。

馬菲奧斯根夏今仗表現非常活躍，開賽初段個人突破後遠射，僅貼柱出界，跟住禁區頂勁射，被門將靴文臣接到，戰至33分鐘，呢位25歲前鋒近門射入打開紀錄。

換邊後，馬菲奧斯根夏轉換角色為隊友創造機會，送出美妙斜傳，就造佐真拿臣射成2比0，踢到比賽末段，根夏橫傳畀洛迪高高美斯射入，贈李斯特城3蛋。馬菲奧斯根夏今季英超上陣29場入15球及6次助攻，據悉曼聯準備今夏以6,250萬鎊(約6.25億港元)收購佢，呢位森巴神鋒以行動證明自己物有所值。

另外，日前宣布將於今季收咧後離隊嘅李斯特城38歲老將射手占美華迪，今仗踢足全場，原本有機會入波，但主射12碼，被狼隊門將荷西沙亞撲出。