紐卡素送葉士域治一程　3支降班球隊全誕生

周六(26日)晚英超，葉士域治作客以0比3不敵紐卡素，篤定下季降落英冠，意味3支降班球隊全部誕生，包括葉士域治、李斯特城、修咸頓。

李斯特城、修咸頓早前已落實降班，排尾3嘅葉士域治只係垂死掙扎，今仗遇上前列勁旅紐卡素，踢到上半場補時被判罰12碼，紐卡素由阿歷山大伊沙克主射入網打開紀錄。

換邊之後，紐卡素再由丹般恩、韋利安奧索拿各自用頭槌破網，大勝3比0，值得一提，呢2個入波都係來自34歲老將捷比亞嘅傳送。紐卡素贏波後，升上第3位，增加奪取下屆歐聯入場券本錢。

根據OPTA統計，葉士域治護級失敗後，英超史上首次出現仲有4輪聯賽情況下，已提早確定所有降班球隊。