奧迪加特6月補辦婚禮　隊友送歐聯冠軍做賀禮？

阿仙奴中場隊長馬田奧迪加特被踢爆上年11月已同凱蓮娜結婚，1個月後更榮升爸爸，原來兩人仲未舉行婚禮，挪威傳媒爆料，「奧隊」將於6月20日至21日補辦結婚派對，多位兵工廠隊友獲邀出席，大家都希望奪得歐聯冠軍，作為賀禮。

現年26歲嘅馬田奧迪加特感情生活低調，並冇正式向外界公布同年長3歲嘅凱蓮娜結婚，原來「奧嫂」係「舞林高手」，曾經喺挪威國內贏得17項舞蹈比賽冠軍，現時係職業舞蹈員。據悉兩夫婦近日已經發出婚禮請柬，馬田奧迪加特嘅多位挪威國家隊及阿仙奴隊友，獲得邀請出席，包括艾寧夏蘭特、夏維斯等。

因此，馬田奧迪加特未來一個幾月公私兩忙，既要籌備婚禮，亦要為阿仙奴力保英超前5位，以及爭奪歐聯錦標。如果兵工廠可以喺歐聯4強淘巴黎聖日耳門，就會喺6月1日凌晨踢決賽，阿仙奴上下都希望奪冠，將獎盃作為最佳結婚賀禮。