倣效車路士　曼聯挖角「新彭馬」

根據英國《太陽報》爆料，曼聯計劃出手向同市宿敵曼城挖角，收購對方新星占士麥艾迪，由於呢位22歲中場只剩下1年合約，如果曼城會方無法說服佢續約，就可能重演當年高爾彭馬轉投車路士一幕。

占士麥艾迪前2季被曼城外借去錫菲聯，今季返回「藍月亮」後有不俗表現，各項賽事上陣25場入7球，由於呢位英格蘭小國腳多數擔任後備，加上只剩下1年合約，有意提出轉會，尋求更多比賽時間，令曼聯有機可乘。如果成事，占士麥艾迪就會成史上第15位效力過「曼市雙雄」一隊嘅球員。

除咗曼聯之外，德甲勁旅利華古遜亦有興趣簽入占士麥艾迪，曾於今年1月開出2,500萬鎊(約2.5億港元)收購佢，但被曼城拒絕。不過，現時情況有變，曼城希望收購利華古遜中場科利安華迪斯，接替今夏離隊嘅奇雲迪布尼，可能用占士麥艾迪作為交易籌碼。