施洛首教英超即奪冠　高普係真正造王者

利物浦上年5月宣布聘請施洛為新主帥，備受外界睇淡，因為呢位46歲荷蘭人當時仍然名不經傳。不過，施洛卻率領紅軍創出佳績，執執首季即捧英超冠軍，令批評者收聲，佢可以迅速獲得成功，最關鍵因素係前任主帥高普花9年時間為利物浦打造冠軍班底。

高普2015年10月臨危受命接手執教利物浦，當時球隊百廢待興，呢位德國名帥獨具慧眼，先後為紅軍簽入多位頂級猛將，門將艾利臣比加、中堅華基爾雲迪積克、翼鋒穆罕默德沙拿都係球隊捧2019年歐聯及2020年英超冠軍嘅功臣，今季繼續發揮重要作用。

此外，高普近年簽入路易斯迪亞斯、賴恩格雲貝治、蘇保斯拉爾等新血，表現亦非常對辦。因此，施洛成為紅軍主帥後，唔需要再花時間組軍執正球隊，即使今季僅簽入「玻璃腳」費達歷高基艾沙，仍然有充裕人腳「自動波」爭標，佢真係要感謝高普留下一筆豐厚「遺產」。