曼城打入英足盃決賽　夏蘭特有望復出爭冠

周一(28日)凌晨英足盃4強，曼城喺中立場倫敦溫布萊球場，以2比0擊敗諾定咸森林，連續3屆晉級決賽。正在養傷嘅射手艾寧夏蘭特近日已經復操，有望復出為「藍月亮」爭奪冠軍。

「神奇球隊」諾定咸森林近期狀態走下坡，反觀曼城愈戰愈勇，此消彼長之下，「藍月亮」佔盡上風，開賽2分鐘就由歷高利維斯射入打開紀錄，呢位英格蘭新星以20歲零157日成為近44年以來，喺倫敦溫布萊球場最年輕入波嘅曼城球員。「藍月亮」繼續搶攻，上半場控球率達75%，並有6次射門，相反森林捱打之下，連1次射門都冇。

換邊後冇耐，曼城再次發動「閃電戰」，馬莫殊開出角球，由加華度爾頂入領先2球。身為上屆英足盃亞軍嘅曼城見大局已定，放慢比賽節奏，令森林有反擊機會，基比斯韋特曾經有2次極具威脅射門，但卻分別中楣同中柱彈出，注定冇運行。

曼城打入英足盃決賽，將於5月17日同水晶宮爭冠軍，「藍月亮」仲有好消息，3月底受傷嘅艾寧夏蘭特可以進行操練，有望趕及復出踢決賽，增加捧盃機會。