麥湯米尼起孖　拿玻里贏波升榜首冠軍在望

周一(28日)凌晨意甲，拿玻里憑麥湯米尼包辦2個入波，主場以2比0擊敗拖連奴，加上原本「一哥」國際米蘭輸波，拿玻里以3分優勢反超前對方，升上榜首，餘下4場聯賽有望帶到尾捧盃。

較早開波嘅國際米蘭主場0比1不敵羅馬，拿玻里只要有分落袋，就可以佔據榜首，球員立即士氣大振，開賽7分鐘就打開紀錄，森保安古沙橫傳，麥湯米尼近門射入。

上半場末段，麥湯米尼喺相同位置再入1球，呢位28歲中場今季聯賽已有11球進帳，成為意甲史上單季最多入波嘅蘇格蘭球員，同時成為自2010/11年球季查理阿當之後，歐洲5大聯賽單季最多入波嘅蘇格蘭中場球員。

麥湯米尼上年夏天被曼聯出售畀拿玻里，獲得重生，穩坐正選頻頻入波，今季各項賽事上陣35場入12球及4次助攻，創下職業生涯單季入球新高，拿玻里可以升上榜首，「麥湯」功不可沒。

拿玻里餘下4場聯賽對手都係弱隊，包括萊切、熱拿亞、帕爾馬、卡利亞里，好大機會全勝捧盃。