大癲！約基利斯食「大四喜」勁過沙拿

周一(28日)凌晨葡超，士砵亭作客大勝博維斯塔5比0，「人氣神鋒」約基利斯又有佳作，個人射入4球，呢位26歲瑞典國腳今季聯賽已第2次食出「大四喜」，有望力壓利物浦前鋒穆罕默德沙拿，奪取今季歐洲金靴獎。

開賽6分鐘，約基利斯就入波，上半場補時再建一功，換邊後又有2球進帳，另1球由麥斯阿拿奧祖射入，協助士砵亭取得聯賽3連勝。

約基利斯今季各項賽事為士砵亭上陣48場入52球，包括聯賽30次披甲入38球，喺歐洲金靴獎排名榜以57分(葡超入1球有1.5分，英超入1球有2分)排第1位，比穆罕默德沙拿多1分。約基利斯獲得曼聯，阿仙奴等大球會垂青，估計身價達7,000萬鎊(約7億港元)，如果佢可以奪得歐洲金靴獎，身價勢必進一步上升。

至於士砵亭贏波後，繼續同賓菲加同分並列第一，今季葡超仲有3輪賽事，根據賽制，同分先計對賽成績，士砵亭首循環贏1比0，雙方將於5月11日凌晨再次交鋒，成為冠軍誰屬最關鍵一仗。