紅魔「窮困」等執平價　睇中桑恩朗達夫

曼聯近年大肆增兵，導致現時「缺水」，難以再重金收購球星，英國傳媒指紅魔鬼今夏向「平價貨」埋手，並睇中紐卡素中場桑恩朗達夫，有望以2,000萬鎊(約2億港元)轉會費簽入呢位27歲英格蘭硬漢。

由於基斯甸艾歷臣已決定今季離隊，卡斯米路亦可能走人，領隊魯賓艾摩廉需要補充中場人腳，考慮到球會推行緊縮開支政策，收購人選有限，桑恩朗達夫屬於其中之一。桑恩朗達夫出身於紐卡素青訓系統，2018年出道以來，一直有不俗表現，但紐卡素被沙特主權基金收購後，簽入般奴古馬雷斯、辛度東拿利等中場猛將，令桑恩朗達夫失去正選。

桑恩朗達夫只剩下1年合約，會方似乎冇打算同佢續約，可能今夏出售佢，曼聯正好可以趁機接貨，估計2,000萬鎊有交易。據悉愛華頓都有興趣簽入桑恩朗達夫，紅魔鬼隨時需要加碼，先至有機會將佢收歸旗下。