曼聯熱刺鬥搶里昂中場　爭持激烈

正希望靠歐霸盃翻身嘅兩支英超落難豪門，曼聯同熱刺，據報將會喺今夏轉會市場拗手瓜，兩隊一齊睇中里昂法國進攻中場卓基，里昂標價3,000萬至3,500萬歐元(約2.64億至3.08億港元)。

英國傳媒報道，21歲里昂進攻中場卓基今季表現出色，今季41場交出12球19助攻嘅「雙雙」數據，早已吸引歐洲各大豪門注視，里昂亦唔阻人前途，接受各方斟介，皇家馬德里同拜仁慕尼黑都表示興趣，暫時以曼聯同熱刺處於領先位置。

曼聯在上圈歐霸盃對里昂，已經近距離觀察過卓基表現，更曾被卓基攻破大門，至於熱刺一直追求具潛質進攻球員，而且巧合嘅係，曼聯同熱刺今季成績接近，聯賽戰績低落，要靠歐霸盃翻身，依家將會喺爭奪卓基之上另開戰場。