普巴與華盛頓聯隊斟介中　復出在望

前曼聯球星保羅普巴3月解禁之後，至今未有落班消息，據報呢位法國中場正同美職球隊華盛頓聯隊斟介，華盛頓聯擁有普巴「發現權」，一旦傾成就復出在望。

美國傳媒報道，華盛頓聯隊正同32歲嘅普巴進行簽約談判，華盛頓聯隊擁有普巴「發現權」，現時普巴只可以同華盛頓聯隊斟介，其他球隊不可插手，此制度係美職聯賽會為防止各隊爭奪球員搶高身價而設。

普巴自從去年11月與祖雲達斯解約後，一直在美國邁阿密獨自操練提升狀態，曾有消息指國際邁亞密班主碧咸同普巴斟介，但未有結果，近日終於傳出普巴同華盛頓聯隊有接觸，並已到簽約階段。

華盛頓聯隊除咗力斟普巴，仲想簽入剛宣布季尾離開曼城嘅奇雲迪布尼，不過迪布尼嘅「發現權」歸國際邁亞密所有，華盛頓聯隊不得染指。