最強左閘！紐奴文迪斯K.O英超兩大強人

巴黎聖日耳門(PSG)同歐聯決賽近在咫尺，整體表現極具冠軍相，其中左閘紐奴文迪斯更加係無名英雄，佢喺16強已經完美封殺利物浦嘅穆罕默德沙拿，今場4強首回合亦成功凍結阿仙奴核心布卡約沙卡，被譽為當今最強左閘！

只得22歲嘅紐奴文迪斯攻守兼備，4年前已經加盟PSG，今季表現更加大熟大勇，16強對利物浦嘅兩回合，成功令到對位嘅穆罕默德沙拿0入球、0助攻，斬斷「紅軍」半臂；8強對阿士東維拉就發揮進攻本能，兩回合都有入波；今輪面對阿仙奴王牌布卡約沙卡就專心防守，一樣搞到對方冇啖好食，沙卡踢到一度發脾氣食黃牌。

Opta數據顯示，紐奴文迪斯今場11次爭球有10次成功，4次高空爭逐亦贏晒，仲有5次成功攔截、3次解圍同3次重奪球權，而且全場冇1次犯規，防守表現近乎完美。呢位葡萄牙國腳賽後表示：「今場係重要一步，1球優勢畀到球隊信心，我哋知道要點做，我為球隊表現感到光榮。」