傳曼聯斟東拿利　岩布仙尼「神理論」力撐

意大利中場辛度東拿利2年前由AC米蘭轉投紐卡素，經歷「賭波門」停賽10個月後，今季表現大熟大勇，前AC米蘭球星岩布仙尼日前表示，東拿利喺紐卡素嘅磨練已經完成，依家夠資格去曼聯擔大旗！

對於東拿利嘅發展，47歲嘅岩布仙尼表示：「當東拿利離開AC米蘭，佢去一間冇咁大壓力嘅球會(紐卡素)，依家我覺得佢已經準備好，轉去要承受更多壓力嘅球隊，曼聯肯定想要佢。東拿利喺曼聯冇得輸，因為曼聯依家已經係個災難，唔會有得再衰。」

意大利傳媒早前報道，曼聯有意喺夏天收購辛度東拿利，作為巴西中場卡斯米路嘅代替者，並指如果紐卡素未能拎到下屆歐聯參賽資格，可能會因為財政條例而被逼放走主力，令曼聯有機可乘。