【有片】哈利甸奴神奇傳中 馬古尼係好翼鋒
曼聯喺歐霸盃4強3比0大勝畢爾包，戰果令球迷非常意外，當中最「估你唔到」嘅一幕，係中堅哈利馬古尼忽然「細哨上身」，喺邊線大玩腳法扭過對手傳中，製造曼聯先開紀錄嘅入球，連領隊魯賓艾摩廉賽後都話：「馬古尼係個好翼鋒！」
今場比賽第30分鐘，踢中堅嘅馬古尼殺上右翼位置爆落底線，面對查列基沙左Cup一下、右Cup一下，玩到對手失晒位後再沉底傳中，畀曼紐爾烏加迪頭槌二傳卡斯米路入波。網上即時有大量改圖將馬古尼同朗拿甸奴「融合」，並且熱傳佢嘅新朵「哈利甸奴(Harrydinho)」。
32歲嘅馬古尼賽後表示：「我諗今仗之後我會有好多新花名，有機會扭下波同做一個靚傳中係非常好，當時禁區內有好多隊友，佢哋相信我可以傳個波入禁區。」領隊魯賓艾摩廉亦大讚：「人生總有啲時候，好似做乜都係錯，而馬古尼依家做乜都幫到球隊，佢其實係個好翼鋒！」