森林輸波兼折將　前5位置岌岌可危

周五(2日)凌晨英超補賽，諾定咸森林喺主場吞賓福特雙蛋，對佢哋爭逐英超前5位置構成重大打擊，而且翼鋒赫臣奧杜爾勇戰受傷，可謂雪上加霜。

今季大部份時間排前5嘅森林，今仗原本贏波就升上第3位，但今場表現被客隊比下去，奇雲舒哈迪同尤尼韋沙喺上、下半場各建一功，助賓福特作客贏2比0。

森林近4場聯賽第3次落敗，目前因得失球差唔及車路士而排第6位，更不幸係赫臣奧杜爾疑似拉傷大腿，半場退下火線，今季仲可唔可以上陣頓成疑問。

森林領隊紐奴賽後表示：「赫臣奧杜爾覺得唔妥，我哋相信係大腿筋問題，呢個係依家最關心嘅問題。球隊需要減少犯錯，希望球員可以搏命最後嘅比賽。」