童話式回歸？菲臘斯有望重返列斯聯

英格蘭中場加雲菲臘斯近年表現低迷，今季被曼城外借去葉士域治未見起色，據報呢位29歲球星獲母會列斯聯垂青，菲臘斯甚至願意大幅減薪，希望可以重返成名地重振雄風。

菲臘斯喺列斯聯出道後，憑出色表現成為英格蘭國家隊正選，但3年前高價轉會曼城後，表現一落千丈，近2季被外借去韋斯咸同葉士域治，已經唔喺曼城計劃之內，今個夏天勢必被割價賣走。

據網站《Football Insider》爆料，來季將重返英超嘅列斯聯，有意收購呢位昔日球迷寵兒，菲臘斯亦會同意將15萬鎊周薪大幅降低，幫助轉會達成。

列斯聯領隊法基擅長幫助球員重生，前曼聯球員丹尼爾占士、熱刺借將文諾索羅門都喺佢領導下「鹹魚翻生」，菲臘斯當然想成為下一個得益者。