維拉再向沙特「輸血」　今夏放走馬天尼斯

阿士東維拉近年進步神速，阿根廷門神達米安馬天尼斯功勞極大，不過呢位32歲老將近期甩漏漸多，據報維拉有意喺夏天「換龍」，或會高價將馬天尼斯送去沙特球會。

據英國《每日電訊報》報道，有沙特球會想引入馬天尼斯，並且願意開出高於所有歐洲球會能夠開出嘅人工利誘。消息指維拉已秘密進行換龍計劃，總監蒙奇多次去考察愛斯賓奴門將祖安加西亞，有意啟動佢合約內2,100萬鎊買斷條款。

維拉近期經常同沙特球會「做生意」，過去1年將穆沙戴亞比同祖漢杜蘭賣去沙特，就換嚟1.1億鎊嘅巨額轉會費收入，傳聞翼鋒里安拜尼同樣獲沙特球會垂青，有望喺夏天「孖住」馬天尼斯一齊去沙特掘金。