「藍月細哨」誕生　杜古成功扭過對手破百

曼城喺周六(3日)凌晨英超主場以1比0擊敗狼隊，兩位比利時國腳玩晒，除咗入波嘅奇雲迪布尼之外，翼鋒謝利美杜古貢獻助攻，並有3次成功扭過對手，呢位22歲新星成為今季英超首位成功扭過對手次數達100大關嘅球員。

謝利美杜古今仗踢足全場，表現非常活躍，多次喺邊路個人突破，曼城所入1球，全靠佢喺禁區左路，擺脫2位對手夾擊後，傳畀奇雲迪布尼射入。

根據《WhoScored》統計，謝利美杜古今場有3次成功扭過對手，令佢今季英超累積扭過對手次數達到101次，被網民捧為「藍月細哨」，將佢同擅長扭波突破嘅巴西名宿「細哨」朗拿甸奴相提並論。

曼城左翼正選位置競爭激烈，謝利美杜古愈戰愈勇，今季各項賽事上陣33場創造15球，包入6球及9次助攻，已追平上季總數字，但比上季踢少10場，成為主帥哥迪奧拿第一選擇，近年表現低迷嘅基亞利殊離隊可能性進一步增加。