馬古尼翻版　卡斯米路留效曼聯

曼聯中場卡斯米路近年因為狀態低迷，多次傳出面臨被出售，但呢位33歲巴西老將近期鹹魚翻生，屢建奇功，有望重演隊友哈利馬古尼絕處逢生好戲，繼續留效紅魔鬼。

卡斯米路上年12月底對紐卡素後，一度被打入冷宮，有1個月冇上陣，其後只有後備披甲機會，直至3月因為曼紐爾烏加迪受傷，把握機會證明自己。尤其是歐霸盃貢獻非常大，8強次回合加時最後關頭作出2次助攻，協助曼聯反勝里昂5比4，上場4強首回合入1球，幫紅魔鬼大勝畢爾包3比0，獲得領隊魯賓艾摩廉大讚，有意留用佢。

值得一提，曼聯中堅哈利馬古尼2年前幾乎被出售，最後獲得留隊，並愈戰愈勇，卡斯米路可能成為「馬古尼翻版」。