水晶宮出售國腳雙星　套現13億

已殺入英足盃決賽嘅水晶宮，打算今夏出售陣中兩大主力套現，兩位都係英格蘭國腳，分別係前鋒伊比爾治伊斯，同埋中堅馬克古希，目標套現1.3億鎊(約13.39億港元)。

26歲嘅伊比爾治伊斯係英籍尼日利亞裔球員，年幼時參加過阿仙奴青訓，在昆士柏流浪出道，2020年加盟水晶宮至今，5季上陣162場入35球，2023年入選英格蘭國家隊，同水晶宮尚餘2年合約，解約金6,000萬鎊(約6.18億港元)，曼聯同熱刺都係潛在買家。

24歲嘅馬克古希係英籍科特迪瓦裔球員，車路士青訓出身，但從未為車路士上陣，外借史雲斯出道，2021年加盟水晶宮至今，4季上陣151場入8球，2022年入選英格蘭國家隊，同水晶宮合約尚餘1年，紐卡素去年夏天曾開價7,000萬鎊(約7.21億港元)求購，遭水晶宮拒絕，今夏會再度報價，今次水晶宮唔會阻止。

如果兩人順利以高價出售，水晶宮將可套現1.3億鎊，主帥格拉斯拿希望收回資金後，買入6名新兵，令球隊在聯賽更具競爭力。