「胖虎」變「壯虎」　卡斯米路加操瘦身重生

曼聯中場卡斯米路近期表現大勇，上場歐霸盃4強首回合入1球，幫紅魔鬼大勝畢爾包3比0，並且跑動距離達到10.55公里，屬於全隊之冠。根據曼聯內部人士爆料，呢位33歲巴西老將勤力加操，成功瘦身，成為大翻生關鍵。

卡斯米路近年因為狀態欠佳，加上年紀漸大，一度被投閒置散，多次傳出可能被出售。英國《曼徹斯特晚報》近日引述球會內部人士消息，指呢位防守中場信心從未受動搖，並保持熱情同鬥心，球隊操練前後，佢都會自己加操，進行體能訓練，身體質素有明顯改善，尤其是成功瘦身。

卡斯米路能夠喺歐霸盃4強首回合，大範圍跑動，正係加操瘦身嘅效果，網民紛紛話綽號「胖虎」嘅卡斯米路，現時已變成「壯虎」，周五(9日)凌晨歐霸盃4強次回合，等睇佢再入波。

曼聯領隊魯賓艾摩廉曾經大讚卡斯米路嘅專業態度，即使擔任後備都冇怨言，似乎有意留用佢。