熱刺黑氣回歸　麥迪臣重傷收咧

正力爭歐霸盃嘅熱刺傳出壞消息，中場占士麥迪臣膝部傷勢惡化，最壞情況要提早收咧，就算熱刺稍後順利殺入歐霸盃決賽，麥迪臣都冇緣上陣。

熱刺正經歷英超隊史最差賽季，皆因整季傷病不斷，捱到近期多位主力傷愈復出，成績有回穩之勢，但關鍵時刻占士麥迪臣又要長抖，都算黑仔。

麥迪臣係熱刺進攻主力，佢喺歐霸盃4強首回合對波杜基林特攻入1球，但再度受傷，初時領隊普斯迪高路指其傷勢無大礙，但幾日後驗傷發現，其傷勢比預期嚴重，膝部韌帶損傷程度仍要進行評估，據估計至少要休息3星期。

麥迪臣已經冇踢聯賽對韋斯咸，亦肯定錯過歐霸盃4強次回合對波杜基林特，而未來兩輪聯賽對水晶宮同阿士東維拉都唔使預，最壞情況係如果晉級歐霸盃決賽，以及聯賽煞科戰對白禮頓都唔出得，即係提早收咧。