C朗想續約3年　並提出3大要求

葡萄牙巨星C朗雖然已經40歲，但仍然未有退役打算，根據沙特阿拉伯傳媒爆料，呢位射手向所屬沙特豪門艾納斯提出續約3年，並有3大要求，包括清洗4位球員，留住5位「親信」，解僱教練皮奧利。

C朗將於今夏約滿，此前普遍消息指佢只會續約1年，為葡萄牙踢完明年世界盃後，就退掛靴。不過沙特媒體《okaz》最新指C朗改變主意，希望續約3年，同時提出改革球隊嘅計劃，包括換帥，出售4位表現唔合佢要求嘅4位外援，分別為門將賓圖，前鋒安祖路加比爾、韋斯利、後衞拿樸迪，以及留住沙迪奧文尼、波索域、祖漢杜蘭等5位好幫手。

根據《okaz》估計，如果艾納斯要滿足C朗上述3大要求，必須額外花費3億沙特里亞爾(約6.22億港元)。C朗加盟艾納斯2年半，仍未為球隊奪得任何正式賽事冠軍，難怪唔少網民認為，艾納斯最需要做嘅事，應該係放棄同C朗續約。