多蒙特斟比寧咸細佬　新特蘭開價2.18億

多蒙特賣走祖迪比寧咸已有兩年，據報佢哋最近又出手，斟介細佬祖比比寧咸，新特蘭開價2,500萬歐元(約2.18億港元)。

19歲嘅祖比比寧咸同佢大哥一樣，喺伯明翰出道，唔同嘅係祖迪比寧咸喺17歲就轉投多蒙特，而祖比比寧咸就改投新特蘭，依家踢緊英冠升班附加賽，如果新特蘭升班，來季有機會英超亮相。

不過就咁上英超，似乎都唔及行番大哥條路更實際，祖迪比寧咸喺多蒙特效力3季之後轉投皇馬，踏上頂級巨星之路，加盟首季就贏得西甲同歐聯冠軍，細佬自然想行呢條路。

英國傳媒報道，多蒙特已同小比寧咸開啟談判，而且祖迪比寧咸嘅成功例子，說服細佬加盟機會大增，之後就要睇多蒙特同新特蘭點傾。