低處未算低　曼聯淨吞韋斯咸兩蛋

周日晚英超，曼聯又輸1場，主場0比2不敵韋斯咸，聯賽敗仗增加至17場，排名再跌1級至16位，繼續挑戰最差下限；反觀韋斯咸結束8場聯賽不勝走勢，借擊敗曼聯谷底反彈。

曼聯今場僅作適度輪換，收起奧拿拿及哈利馬古尼，改用比恩迪亞把關，再用約羅打中堅，以及左翼由哈利阿馬斯打正選，不過問題係佢哋要留力歐霸盃決賽，聯賽唔使太搏命，整體表現都受影響。

韋斯咸一次突如其來攻勢就搞掂，倒戈嘅雲比沙卡左路送直線，古度斯落低線傳中，湯馬士蘇錫克近門撞射破網，韋斯咸26分鐘領先1比0。

曼聯下半場未見起色，跟手仲要輸多粒，曼紐爾烏加迪中場控甩波，古度斯推順分去左路，雲比沙卡再交畀空晒嘅查洛保雲射成2比0。

比賽尾段曼聯狂攻，其中海倫龍門口起腳都射唔入，畀艾路拿救出，整定曼聯破唔到蛋，淨輸兩粒完場。