安察洛堤遺憾告別皇馬　信任阿朗素能力

皇家馬德里喺「國家打吡」不敵巴塞隆拿，西甲爭霸希望名存實亡，教練安察洛堤係皇馬史上奪冠最多教頭，可惜最後一季落得「四大皆空」收場。夏天將離開皇馬嘅安察洛堤，表示盛傳將接任皇馬教練嘅沙比阿朗素係世界最佳教練之一，有能力執教世界任何球隊。

今場「國家打吡」係安察洛堤第350場執教皇馬，係球會史上第2位，呢位意大利教練賽後表示：「呢場係今季最後一場國家打吡，但我哋仲要爭取贏晒最後3輪，好明顯今場防守得好差，但球隊一直戰鬥到最後，喺態度同投入方面無可挑剔，唔好忘記我哋有5個後衞受傷缺陣。」

傳聞安察洛堤已傾掂教巴西國家隊，而利華古遜教練沙比阿朗素亦宣布離隊，下季轉教皇馬已成公開秘密，安察洛堤表示：「我有睇阿朗素宣布離開利華古遜，佢喺德甲有神奇嘅成就，佢可以執教世上任何一間球會，因為佢已經證明自己係世界最佳教練之一。」

沙比阿朗素周日(11日)帶領利華古遜踢完最後一場主場賽事，雖然以2比4不敵多蒙特，但完場後仍舉行告別派對。