冤家路窄　查頓辛祖或再遇坦哈格

今季外借到車路士嘅查頓辛祖，雖協助球隊打入歐協聯決賽，但車路士已表明季尾會退番畀曼聯，英國傳媒報道，「紅魔鬼」打算將查頓辛祖推銷畀利華古遜，而坦哈格剛好是利華古遜新帥候選人之一，令查頓辛祖同坦哈格呢對冤家有機會再聚頭。

車路士放棄買斷查頓辛祖，要向曼聯賠償500萬鎊(約5,170萬港元)，由於查頓辛祖並不在魯賓艾摩廉計劃當中，如果今夏未能將其出售，就要畀佢「齋坐」1年至2026年6月約滿，據報曼聯願意將其轉會費減至2,000萬鎊以下，利華古遜是潛在買家之一。

利華古遜翼鋒科利安華迪斯今夏離隊，將轉投拜仁慕尼黑，需要補充翼鋒空缺，查頓辛祖兩度效力多蒙特都有好表現，證明適合在德甲發展，只要佢肯放棄周薪25萬鎊高薪，利華古遜就會考慮簽佢。

巧合嘅係，利華古遜正物色新帥，其中坦哈格係候選人之一，坦哈格同查頓辛祖在曼聯時期有好深「牙齒印」，如果兩人竟然喺利華古遜重聚，勢必一地花生。