貝迪斯踢歐聯機會渺茫　安東尼焗返曼聯？

周五(16日)凌晨西甲，貝迪斯作客只能逼和華歷簡奴2比2，落後第5位維拉利爾5分，餘下2場聯賽要反超前對方，奪取下屆歐聯入場券機會渺茫。盛傳一旦貝迪斯無緣下屆歐聯，就無法買斷安東尼馬菲奧斯，意味呢位巴西國腳焗住重返曼聯。

華歷簡奴憑迪費魯圖斯頭槌破網，加上科利安利祖尼射入罰球，上半場領先2比0。換邊之後，貝迪斯傾力反擊，由古曹靴南迪斯建功，加上艾斯高射入12碼逼和2比2。

至於被曼聯外借去貝迪斯後，表現大勇嘅安東尼馬菲奧斯今仗踢足全場，但演出唔及之前搶鏡。貝迪斯原本打算取得下屆歐聯參賽資格，確保有巨額收入後，就出手買斷安東尼，但現時如意算盤未必打得響。據悉另1支西甲球隊馬體會有興趣簽入安東尼，佢最終能否留喺西甲，仍然存在變數。

另外，畢爾包作客以2比0擊敗基達菲，肯定獲得前5位，相隔11年再次獲得歐聯入場券，餘下1個歐聯席位，好大機會落入維拉利爾手上。