曼聯好消息　國米想借舒克斯

今季上陣48場，只能為曼聯交出7入球3助攻嘅荷蘭前鋒約舒亞舒克斯，今夏好大機會被清洗，據報國際米蘭有意借用，如果表現合格，願意畀3,500萬歐元(約3.06億港元)另加浮動獎金買斷。

意大利傳媒報道，雖然約舒亞舒克斯在曼聯表現未如理想，但國際米蘭認為，該23歲前鋒之前喺博洛尼亞有過好表現，相信意甲先係佢表演舞台，所以希望以外借形式將佢帶返意大利，而人工亦會同曼聯睇齊，周薪約5萬鎊。

曼聯去年夏天以4,250萬歐元簽入約舒亞舒克斯，現時同曼聯仲有4年約，如果繼續用佢，球隊成績好難提升，依家國米肯借用，仲願意畀買入價接近8成轉會費買斷，相信呢單交易好快傾得成。