謝德謙：一隊攻一隊守　等睇加時

足總盃冠軍爭霸戰喺溫布萊球場上演，由水晶宮迎戰曼城，牌面上「藍月亮」相信會被睇高一線，不過一場過決賽加上水晶宮近況甚佳，預計會上演一場激戰。

水晶宮近5場比賽保持不敗，上場聯賽作客以2比0擊敗熱刺，中場核心伊比爾治伊斯取得2個入波表現八面玲瓏，估計大大提升主帥格拉斯拿今場決賽嘅信心。水晶宮雖然今場牌面輸蝕，相信格拉斯拿會精心部署防守策略，加上球隊今季防線表現出色，特別係門將甸恩軒達臣肯定今場大把表現機會。

藍月亮季尾狀態回勇，但上場聯賽作客修咸頓打和0比0，全場多達26次射門竟然食白果，主力射手艾寧夏蘭特復出踢出全場，表現麻麻相信狀態仍然有待提升。主帥哥迪奥拿深知今場必定係攻防戰，務求盡早爭取入球，唯有依靠一眾中前場球員菲爾科頓、奇雲迪布尼及貝拿度施華等個人能力。決賽場合雙方必定毫無保留，加上水晶宮防守能力出色，估計今場法定時間可以頂得住藍月亮猛烈進攻，相信今場大有機會進入加時決勝負。