迪布尼暗示有機留英超　沙拿：利物浦有位畀你！

曼城喺英足盃決賽意外倒灶，今季落得「四大皆空」結局，夏天將會約滿離隊嘅奇雲迪布尼，曼城光輝生涯竟要遺憾收場。不過，迪布尼嘅英超生涯可能仲未玩完，佢喺英足盃賽後暗示，如果有合適球會斟介，會考慮繼續留喺英超比賽，而利物浦球星穆罕默德沙拿就率先表態，歡迎迪布尼加盟！

迪布尼喺曼城10年生涯，未能用冠軍獎盃結束，賽後被問到下季去向，呢位比利時名將表示：「我同一眾球會傾緊，無論決定係點，我只想踢好嘅足球。繼續留喺英格蘭？視乎有咩球會斟介......我有家庭、有細路，我嘅決定要照顧晒所有人嘅需要，所以好複雜。」

早前有報道指，利物浦打算向迪布尼開出聘約，雖然目前只聞樓梯聲，但「紅軍」王牌沙拿日前接受《天空體育》訪問，已經出招：「我先要恭喜佢(迪布尼)足球生涯嘅成就，佢喺曼城有傑出貢獻，係英超嘅偉大球員，希望佢有好嘅發展。同埋，我哋(利物浦)都有位留畀迪布尼！」